Taal: Nederlands Taal: Venloos (aktief)

Veurstellinge

De veurstellinge van Volkstheater Frans Boermans:

Historie

De ierste oètveuring in 2004 waas ‘t tenielstök "Heibel op 't Hetje" det zich aafspeulde in ein volksbuurt van Venlo umstreeks 1950. Speulers, regisseur en de minse achter de scherme brachte ein ónvergaetelik stök 17 kier op de planke in ‘t Citytheater de Avenue in Venlo.

In 't naojaor van 2006 volgde de oètveuring "Nova Venlo" in de Maaspaort in Venlo. Wie reagere einkinnige en chauvinistische Venlonaere op 'n nieje en gevaorlike umgaeving. Geschreve door Frans Pollux

In 't naojaor van 2008 woort "Ze Kump" op de planke gebrach.'t Verhaol geit euver de Oranjevereiniging die eur jubileum viert. Geschreve door Frans Pollux

'n Speciale oètveuring waas in december 2009 en 2010 in de kepél van de Mutsaersstichting in Venlo met "Sjraar de Clochard" Ein in de kerssfeer geschreve stök van Frans Boermans.

In november 2011 stónd "Heb geej ouk de Razzeldazzel" op stapel.Kroegbaas Nol Detillon veult zich krank; ouk zien klante hebbe allemaol wat. Dochter Francien vindt det zeej zich aanstelle en verzekeringsagent Kletskes haet 't juuste recept.

In september 2013 woorte 14 kier de veurstellinge van de "Beej ós in de Floddergats" oetgeveurd. 'n Verhaol euver leefde en bedrog det zich afspeulde in 't kleinste sträötje van Venlo, geschreve door Sef Peeters.

Vieftieën volle zalen trok " 't Patternaat" in november en december 2015. Det ging euver 'ne groep wièkbewoeëners die gelök en dreufenis same deilde in eur Patternaat, geschreve door Sef Peeters.

In 2017 woort ’t laeve van Frans Boermans oetgebeeld in " ’t Is maar veur efkes". Óngetwiefeld ein hoeëgtepunt in ’t bestaon van ’t Boermanstheater. De veurstelling, geschreve door Sef Peeters, woort 17 kier opgeveurd.

"Vraemp Geld" oet 2019 waas ein doldwaze kemedie euver ’n femilie die vals geld ging drökke. Dit deje ze um eur schöld aaf te betale die ze gemak hadde wie ze de Lotto wónne, maar vergote ’t winnende lot in te levere. 17 veurstellinge, andermaol geschreve door Sef Peeters.

Vanwaege de coronapandemie woort de veurstelling van 2021 oetgesteld en woort d'r -wie 't weer kós- gewerk aan 'n alternatieve veurstelling in Domani. Dreej einakters met as thema én titel "Gelouf, haop en leefde". 5 oetverkochte veurstellinge in jannewarie 2023. Geschreve door Sef Peeters, Mark Wienen en Alwin Grijseels.

 

't Is maar veur efkes

Vraemp geld