Taal: Nederlands Taal: Venloos (aktief)

't Patternaat (2015)

Tiedes de fieftiger en sestiger jaore speult ’t patternaat ein belangrièke rol in ’t laeve van de parochiane. ‘t Door de kerk gestichte retraetehoès krieg in daen tièd langzaam maar zeker ein mier waereldlike functie. D’r woort film gedreid, muziek gemak en gedans. De parochiane troffe zich veur ein tas kóffie, ein stökske flaaj en ein lekker glaeske beer. Minnige jóng dörfde tiedes de dansles in ‘t patternaat veur de ierste kier ein maedje vas te halde. Minnig maedje vónd heej ziene jóng.

Ties Smeets is oètbater van ’t Patternaat. D’r is vuuel achterstallig ónderhald en d’r is gen geld um ‘t op te knappe. As ziene grutste geldscheter ouk nog dreig zien beejdrage te stoppe zuut hae de buuj al hange. Eine verdwaalde Hollender wet waal raod, maar mótte weej det geluive? Ties mót ’t hebbe van zien vaste klante. Ein gemink koeér, VVV supporters, d’n instuif en ein Tupperware Party bringe nog wat geld in ’t laejke. Maar ja, met zoeëvuuel minse raekening halde velt neet mei. Veural as de deugzaamheid van zien dochter Lisette in ‘t geding kump zien de rape gaar.

Therése Boitelle haet zich opgewerk van ein gewoeën Venloos volksmaedje, Treesje Henderickx, tot ein veurname dame op stand. “De baetere klasse”. ’t Meus daoveur waal trouwe met Arnold Boitelle, ‘ne rièke fabrikant. Óndanks zien diekdonerie kint ’t ziene komaaf neet verberge. Eure zoon Harrie is zien alles. Het wilt det Harrie, Arnold in ‘t bedrièf opvolg. As ein jónk maedje zien planne dreig te doorkruutse, zal Therése d’r alles aan doon um det te veurkómme.

D’r is laeve genóg in ós patternaat. ’n Koeér det rippeteert veur de Keunegin, VVV supporters die ‘t zoevuuelste verleer mótte verwerke, ein Tupperware Party die in ’t hónderd löp, ein instuif wao in de Cliff en de Elvis fans taege euver ein staon en ein stelletje halve gare die de zaak euverhoup haole. “Neet idderein haet zichzelf gemak” zoele weej maar zegge en det is van toepassing op al ós patternaat bezeukers. ’t Patternaat is volksteniel det geit euver leefde, pien, bedrog, aafguns, ermood, rièkdom, ruziemake en weer beejlegge en det ’t laeve ein groeët fees is. Eigelik geit ’t euver gewoeëne minse, euver ós.