Taal: Nederlands Taal: Venloos (aktief)

Euver Frans Boermans

Frans Boermans (8 juni 1917-11 maart 1999) behuurt tot d'n toep van de Limburgse dichters en schrievers. Volges um stelde zien werk niks veur en waar van meining det hae meus oppasse um neet van gruuetsigheid naeve zien schoon te loupe as um ier woort toegezweid. Det zag hae in idder geval beej de toekinning van de Jo Hansenpries .

Laeveswins

Maar beej die zelfde gelaegenheid goof hae, d’n draak met zichzelf staekend, aan det hae d’r euver naodach "um net wie iddere VIP allewiels mien memoires in elf deile oet te gaon gaeve, maar gennen oetgaever wilt aan de oetgave waat oetgaeve waeges de hoeëge oetgave". De waorheid waas, det Frans Boermans, ofschoeën Stichting Henric van Veldeke um heejveur mierdere kiere euver aansprook, zien eige werke neet belangriek genóg vónd um die anders dan as leed of revue- oet te gaeve.

Cato

Van d’n andere kant leet hae noeëts nao um, lieënend beej de Romeinse schriever en politicus Cato, ziene laeveswins nao veure te bringe met de wäörd: "Euveriges bin ik van meining, det d’r in Venlo ’n klein Noord-Limburgs streektheaeterke mót kómme wao allein dialekstökker in waere gespeuld".

Wie Frans Boermans waas euverleje en zien literaire naolaotenschap door zien vrouw en kinder beschikbaar woort gesteld, waas d’n tied riep um zien werke veur de taegeswaordige en kómmende generaties toegankelik te make én um nao te gaon of ziene hertenwins um ein volkstheater te realisere in vervölling kós waere gebrach. Deze wins is oetgekómme met 't " Volkstheater Frans Boermans "en de " Frans Boermanszaal " in De Maaspoort in Venlo.

't Theater van 't Laeve

Ónder deze titel brach Dialekvereiniging Veldeke Venlo in 't jaor 2000 ein biografie oèt euver 't laeve en 't werk van Frans Boermans, geschreve door Adri Gorissen.

Stadsarchief

De hónderde tekste die Frans Boermans haet geschreve zien door de Veldeke gearchiveerd, en bewaard in 't Venlose stadsarchief.

Iereprieze

1971 Limburgse Cultuurpries
1978 Brónze Eindaagsvleeg
1984 Venlonaer van 't Jaor
1989 Ierepenning van Venlo
1997 Jo Hansenpries
1999 Venlonaer van de ieëw

Frans Boermans op Wikipedia

Buste van Frans Boermans

Borsbeeld van Frans Boermans gemak door kunstenares Mientje Maas en geschónke door Jan van Groenendaal. 't Beeld is te zeen in de Frans Boermanszaal van de Maaspoort in Venlo.

Frans Boermans (links) en burgemeester van Graafeiland

Frans Boermans (links) en börgemeister van Graafeiland.